user_mobilelogo

Иген диңгезе басуның

Ярларыннан чыкты шаулап,

Һәм атылды алтын ташкын

Келәтләргә - урын даулап.

 

Һәр бөртеге сары алтын-

Алтын кояш янгангадыр,

Һәрберенә игенченең 

Алтын тире тамгангадыр.

 

Һәр бөртеге сары алтын-

Сабыр итеп көткәнгәдер,

Вакыт җиткәч һәр минутны 

Алтынга тиң иткәнгәдер.

 

Иген кайта, сары алтын

Шаулап тула келәтләргә.

Өмет биреп киләчәккә,

Дәрман өстәп йөрәкләргә.