Мин җыр язам,
Сине сөюемне
Салам менә шигырь юлына.
Күңелемнән генә теләк телим:
Юлыксын ул синең кулыңа.
Шигырьләрем сиңа юлыксыннар
Мең – меңнәрчә шигьри юл аша,
Моңы күңелеңә юллар тапсын
Галәмдәге сансыз моң аша.
Берәр вакыт, әгәр, син аларны
Күреп алсаң, танып тыңласаң,
Көйгә салсаң, аннан җырың итеп
Моңнарыңа кушып җырласаң...
Мин булырмын җирдә кешеләрнең
Иң – иң бәхетлесе шул чакта –
(Минем әйтелмәгән мәхәббәтем
Барып җитте сиңа җыр аша!)
Мин җыр яздым, сөюемне яздым.
Син тап аны, җырла, югалтма!

